Heimsóknarvinur er sjálfboðaliði sem heimsækir gestgjafa sinn að öllu jöfnu einu sinni í viku.

Fyrirkomulag heimsóknarinnar er samkomulag en oftast spjallar fólk saman yfir kaffibolla eða fer í gönguferðir. Einnig getur heimsóknarvinur lesið fyrir viðkomandi.

Sjálfboðaliðar sem sinna heimsóknarþjónustu fara á sérstakt námskeið hjá deildinni og eru bundnir þagnarskyldu. Vitneskja um persónulega hagi fer ekki lengra. Mikilvægt er að geta hlustað, talað við fólk á rólegum nótum og tekið hverjum og einum eins og hann er.

Hægt er að senda inn beiðni um heimsóknavin með því að smella hér.

Hundavinir

„Heimsóknavinur með hund“ er eitt verkefni heimsóknavina. Heimsóknavinir af þessu tagi, þar sem hundurinn er í aðalhlutverki, eru þekktir víða um heim og sums staðar taka hundarnir virkan þátt í þjálfun og endurhæfingu sjúklinga. Hundavinirnir á vegum Rauða kross Íslands fara í reglubundnar heimsóknir á stofnanir og heimili m.a. til langveikra barna, aldraðra og fatlaðra.

Þó nokkur undirbúningur liggur að baki hverrar heimsóknar. Eigendur hundanna þurfa að byrja á því að láta skoða hundinn til að ganga úr skugga um að hann henti í verkefnið. Standist hundurinn matið þarf eigandinn að fara á þriggja tíma námskeið fyrir almenna heimsóknavini og klukkutíma námskeið sem er sér sniðið að hundaheimsóknum. Eftir það er fundinn gestgjafi sem vill fá heimsókn frá hundi og eiganda hans.
 

Heimsóknarþjónustan hefur verið starfandi í Hafnarfirði frá árinu 2002 og hefur gengið mjög vel. Ef þú vilt gerast heimsókarvinur í Hafnarfirði, vilt fá heimsókn eða veist um einhvern sem mundi hafa áhuga á heimsóknum þá endilega hafðu samband við okkur í síma 565-1222.

 

Frá því í október 2006 hefur hópur heimsóknarvina hjá Hafnarfjarðardeild heimsótt hælisleitendur einu sinni í viku.

Hælisleitendur er sá hópur fólks sem sækir um hæli á Íslandi og óskar þar með eftir að fá viðurkenningu á stöðu sinni sem flóttamenn. Á meðan að á málsmeðferð stendur búa hælisleitendur á gistiheimili í Njarðvík í umsjón Félagsþjónsutunnar í Reykjanesbæ samkvæmt samningi þeirra við Útlendingastofnun. Rauði kross Íslands sinnir réttindagæslu fyrir hælisleitendur.

Hælisleitendur búa við mikla félagslega einangrun og eru undir miklu andlegu álagi. Hópurinn sem sinnir heimsóknum hefur það að markmiði að rjúfa þessa einangrun og létta fólki lífið og biðina á meðan á málsmeðferð stendur. Þrír til fjórir heimsóknarvinir heimsækja hælisleitendur hverju sinni.

Sjálfboðaliðar verða að hafa gott vald á a.m.k. einu erlendu tungumáli. Málakunnátta sem einkum er sóst eftir er kunnátta í ensku, þýsku, frönsku, rússnesku, arabísku og farsí. Aldurstakmark í verkefnið er sett við tuttugu og þriggja ára aldur. Allar nánari upplýsingar má fá á skrifstofu okkar.

Ég vil gerast sjálfboðaliði